ХVIII Халықаралық Жәутіков олимпиадасы

2022 жылы 16-23 ақпан аралығында Алматы қаласында РФММ 50 жылдық мерейтойын тойлау аясында «Республикалық физика-математика мектебі» базасында математика, физика және информатика пәндері бойынша ХVIII Халықаралық Жәутіков олимпиадасы өтті. Олимпиаданың бірегейлігі дәстүрлі түрде физика-математика бағытындағы мамандандырылған мектептер арасында бірден үш пән бойынша өткізілетіндігінде.

Биыл дәстүрлі олимпиадаға Қазақстан, Әзірбайжан, Армения, Белоруссия, Болгария, Грузия, Индонезия, Иран, Қырғызстан, Моңғолия, Ресей, Румыния, Сербия, Тәжікстан, Түрікменстан, Өзбекстан, Украина, Норвегия, Үндістан, Түркия, сондай-ақ Вьетнам сияқты әлемнің 21 елінен 1200-ге жуық оқушы, 146 команда қатысты.
Олимпиада қорытындысы бойынша Нұрлан Қаппаров, Адлет Имамбеков және Илья Сегалович атындағы арнайы сыйлықақылар табыс етілді.

Нұрлан  Каппаров атындағы сыйлықақыны ХЖО-2022 математикадан абсолютті чемпионы, Украина командасының мүшесі, «Kharkiv Junior Karazin University»оқушысы — Ihor Pylaiev алды. Адлет Имамбеков атындағы сыйлықақыны ХЖО-2022 физикадан абсолютті чемпионы, Ресей командасының мүшесі, Долгопрудный қ. П. Л. Капицы атындағы «Физтех-лицейдің» оқушысы — Вадим Ерин алды. Ал Илья Сегалович атындағы сыйлықақы ХЖО-2022 информатика бойынша абсолютті чемпионы, Ресей командасының мүшесі, Новосібір қаласындағы «Горностай» ББО оқушысы — Нагибин Всеволодқа бұйырды.

Олимпиадаға қатысқан әр қатысушыны және әр команданы құттықтаймыз және жақсы командалық жұмыс үшін алғыс айтамыз. Бұл өмірлеріңіздің соңына дейін сіздермен бірге болатын тәжірибе. Сіздер дайындық пен кәсіпқойлықтың жоғары деңгейін көрсетіп, олимпиадада өз мектептеріңізді лайықты түрде көрсеттіңіздер.

Келесі ХЖО-да кездескенше!