Жаңа кеңістік, жаңа мүмкіндік

Алматы қаласындағы Республикалық физика-математика мектебі филиалының 1972 жылы салынған тарихи ғимараты толық қайта жаңғыртудан өтті. Бұл — мектептің 54 жылдық тарихындағы ғимаратты ауқымды жаңғыртуға бағытталған алғашқы кешенді жоба.

Жаңарған кампустың жалпы аумағы 12 мың шаршы метрден асады. Үш қабатты ғимарат заманауи білім беру талаптарына сай қайта жабдықталып, оқушылар мен педагогтер үшін қолайлы әрі функционалды білім беру ортасы қалыптастырылды.

Кампус құрамында заманауи оқу кабинеттері мен зертханалар, конференц-зал, жобалық және зерттеу жұмыстарына арналған кеңістіктер, кітапхана, рекреациялық аймақтар, шахмат кабинеті, үстел теннисі алаңы, мұғалімдерге арналған жұмыс кеңістігі және лекторий бар.

Мектептің қайта жаңғырту жұмыстарына оның әр жылдардағы түлектері ерекше үлес қосты. Олардың қатарында мектептің 1987 жылғы түлегі, «РФММ» КеАҚ Директорлар кеңесінің төрағасы Берік Сералыұлы Қаниев бар. Оның қолдауымен мектептің лекториясы жаңғыртылып, білім алушыларға дәрістер, кездесулер, пікірталастар мен білім беру іс-шараларын өткізуге арналған заманауи кеңістік жасалды.

«Мен бұл мектепті 1987 жылы бітірдім. 1 қыркүйекте оның табалдырығын аттайтын балалар мүлде басқа мектепті көреді. Бүгін Алматыда РФММ-ның жаңа кампусы ашылды. Бұл — 54 жыл ішіндегі алғашқы толық жаңғырту. Мектепті қолдаған әрбір түлекке үлкен рақмет», — деді Берік Сералыұлы Қаниев.

РФММ тарихында мектеп түлектерінің орны ерекше. Осы жылдар ішінде білім ордасы 12 мыңнан астам түлек тәрбиелеп шығарды. Бүгінде оның түлектері ғылым, білім, технология, бизнес және басқа да маңызды салаларда еңбек етіп, Қазақстанның дамуына өз үлесін қосып келеді. Мектеп түлектерінің шамамен 40 пайызы жыл сайын әлемдік рейтингтегі үздік 100 университетке оқуға түседі.

Жаңғыртылған кампус — мектептің көпжылдық дәстүрін сақтай отырып, білім алушылардың академиялық, зияткерлік және шығармашылық әлеуетін дамытуға жаңа мүмкіндік беретін заманауи білім беру кеңістігі.