ҚАЗАҚСТАН ҚҰРАМАСЫ IYPT 2026 ТУРНИРІНДЕ HONORABLE MENTION МАРАПАТЫНА ИЕ БОЛДЫ

Цюрих қаласында Жас физиктердің 39-шы халықаралық турнирі — International Young Physicists’ Tournament (IYPT 2026) өз мәресіне жетті.

Биылғы турнир әлемнің жетекші жоғары оқу орындарының бірі — ETH Zurich университетінде өтті. Бұл оқу орнында көрнекті физик Альберт Эйнштейн білім алып, кейіннен дәріс берген.

IYPT — мектеп оқушыларына арналған ең беделді халықаралық ғылыми жарыстардың бірі. Дәстүрлі олимпиадалардан ерекшелігі — қатысушылар бір жыл бойы ашық сипаттағы зерттеу есептерімен жұмыс істейді: ғылыми болжамдар ұсынады, тәжірибелер жүргізеді, теориялық модельдер құрады және зерттеу нәтижелерін ағылшын тілінде Physics Fights форматындағы ғылыми пікірталастарда қорғайды.

Бес кезеңнің қорытындысы бойынша Қазақстан құрамасы Honorable Mention құрмет марапатына ие болған командалардың қатарына енді.

Қазақстан құрамасының сапында РФММ оқушылары: команда капитаны Диас Алишер, Султанмурат Дауренбай, Жахар Мухамеджан, Аина Ахметова, сондай-ақ Haileybury Almaty мектебінің оқушысы Анна Пак өнер көрсетті.

Бұл жетістіктің артында бірнеше айға созылған қарқынды ғылыми-зерттеу жұмысы, көптеген тәжірибелер, деректерді талдау, терең теориялық дайындық және халықаралық деңгейдегі ғылыми пікірталастар тұр.

Құраманы Кундуз Моминовна Туреханова және Шерзод Рустамович Адилов ғылыми тұрғыдан дайындады. Кундуз Туреханова Қазақстан атынан IYPT Халықаралық ұйымдастыру комитетінің (IOC) құрамында қызмет атқарады.

Қазақстан ұлттық құрамасына қолдау көрсетіп, дарынды жастардың дамуына үлес қосқан Тимур Құлыбаевтың «Халық» қайырымдылық қорына ерекше алғысымызды білдіреміз. Қордың қолдауының арқасында жас зерттеушілер елімізді әлемдегі ең беделді халықаралық ғылыми турнирлердің бірінде лайықты таныстыруға мүмкіндік алды.

Қазақстан құрамасын және оның ғылыми жетекшілерін халықаралық марапатымен құттықтаймыз!

Жас физиктерімізге жаңа зерттеулер, батыл ғылыми идеялар және әлемдік ғылым кеңістігіндегі толағай жетістіктер тілейміз!

Қазақстан құрамасымен мақтанамыз! ❤️