Алматы қаласындағы «РФММ» КеАҚ филиалы уақытша қашықтықтан оқуға жіберілді. ​

2026 жылғы 12–13 қазан аралығында Алматы қаласындағы «Республикалық физика-математика мектебі» Коммерциялық емес акционерлік қоғамы филиалының оқушылары арасында жедел ішек инфекциясының белгілері тіркелді.

2026 жылғы 14 қазандағы жағдай бойынша, 48 оқушы қалалық балалар жұқпалы аурулар ауруханасына жатқызылып, стационарлық ем қабылдауда. Тағы 6 оқушы интернаттың медициналық оқшаулау бөліміне орналастырылып, дәрігерлердің бақылауына алынды.

Орын алған жағдайдың себептері қазіргі уақытта анықталуда. Ауруханаға жатқызылған оқушыларға Қазақстан Республикасы Денсаулық сақтау министрлігінің клиникалық хаттамаларына сәйкес ем тағайындалды.

Санитариялық-эпидемиологиялық қызмет мамандары мектеп пен мектеп-интернатта тексеру жүргізіп, зертханалық талдауға зерттеу сынамаларын алды. Мектеп ғимараты мен мектеп-интернатта дезинфекциялау жұмыстары жүргізілді.

Қазақстан Республикасының Бас мемлекеттік санитариялық дәрігердің Қаулысына сәйкес мектеп- интернаттың және ас блогының жұмысы уақытша тоқтатылды.
Қауіпсіздікті қамтамасыз ету мақсатында 14–16 қазан аралығында оқу сабақтары онлайн форматта өтеді. Интернатта қалған оқушылар ата-аналарына немесе жақын туыстарына тапсырылатын болады.

Жағдай мектеп әкімшілігі мен тиісті мемлекеттік органдардың бақылауында.