Математика, физика және информатика пәндері бойынша ХХ Халықаралық Жәутіков олимпиадасының салтанатты ашылуы өтті

2023 жылдың 8 қаңтар күні Алматы қаласының, “Алматы театр” ғимаратында математика, физика және информатика пәндері бойынша ХХ Халықаралық Жәутіков олимпиадасының салтанатты ашылуы өтті. Осы жылы олимпиадаға әлемнің 15 елінен, 650-ден астам қатысушы, сондай-ақ халықаралық қазылар алқасының мүшелері қатысады. Досаев Ерболат Асқарбекұлы – Алматы қ. әкімі, Жумадильдаева Наталья Васильевна – Қазақстан Республикасының Оқу-ағарту бірінші вице-министрі, Калиев Руслан Серикович – КеАҚ РФММ басқарма төрағасы, және Джумадильдаев Аскар Сериккулович – олимпиаданың халықаралық қазылар алқасының төрағасы, ҚР Ұлттық Ғылым академиясының академигі құттықтау сөз сөйледі.

Олимпиаданың ерекшелігі – әлемнің мамандандырылған физика-математика мектептері арасында бірден үш пән бойынша өткізілуі. Осы жылы үш жылдық онлайн форматтан, олимпиада қайта офлайн форматта ұйымдастырылуда.

Олимпиадаға Қазақстан, Әзірбайжан, Армения, Беларусь, Ресей, Қырғызстан, Өзбекстан, Болгария, Тәжікстан, Моңғолия, Грузия, Сербия, Түркия, Түрікменстан және Румыния сынды 15 елден, 600-ге жуық оқушы қатысуда.

“Жыл сайын олимпиада әлемнің әртүрлі бұрыштарынан қатысушыларды тарта отырып, әлемдік ғылыми күнтізбеде маңызды оқиғаға айналуда. Осы зияткерлік жарыстарға қатысу үлкен құрмет қана емес, сонымен қатар өз мектебіңіздің, өз аймағыңыздың атынан шығатын әрбір адам үшін үлкен жауапкершілік”, – Алматы қ. әкімі Досаев Ерболат Асқарбекұлы өз сөзінде атап өтті.

Олимпиаданың мақсаты: оқушылар арасында физика-математика ғылымдарын насихаттау, халықаралық ынтымақтастықты дамыту, түрлі елдердің мамандандырылған мектептері арасында достық қарым-қатынас орнату, олимпиадаларды ұйымдастыру және өткізу тәжірибесімен алмасу, сондай-ақ Қазақстанның Білім және мәдениет деңгейін көрсету.

Олимпиада 8-13 қаңтар аралығында 20 жыл бойы осы іс-шараның ұйымдастырушысы болып табылатын Республикалық физика-математика мектебінің аясында өтуде.