Young Researchers Tournament

2026 жылғы 7–8 ақпан күндері Алматы қаласындағы Республикалық физика-математика мектебі базасында Young Researchers Tournament (YRT) — Жас зерттеушілер турнирі өтеді.

YRT — оқушылардың ғылыми-зерттеу қызметін, эксперименттік ізденісін және академиялық пікірталас мәдениетін дамытуға бағытталған зияткерлік турнир. Байқау форматы ағылшын тілінде өткізіледі және STEM бағыттары аясында пәнаралық зерттеу есептерін талдау мен қорғауды қамтиды.

Турнирдің басты мақсаты — оқушылардың ғылыми ойлау қабілетін қалыптастыру, ғылыми пікірталас жүргізу дағдыларын жетілдіру, сондай-ақ халықаралық ғылыми коммуникация талаптарына бейімдеу.

2026 жылы турнирге 44 команда, 204 қатысушы, 18 мектептен тіркелді. Қатысушы білім беру ұйымдарының қатарында РФМШ, НЗМ, Физтех, «Бөбек», Шоқан, Haileybury және басқа да жетекші мектептер бар.

Командалардың баяндамалары мен ғылыми пікірталастары STEM-білім беру саласындағы 40-тан астам сарапшының қатысуымен бағаланады. Атап айтқанда, қазылар алқасының құрамына Әл-Фараби атындағы Қазақ ұлттық университеті физика-техникалық факультетінің профессор-оқытушылары да тартылған.

Young Researchers Tournament — оқушылардың ерте жастан ғылыми-зерттеу мәдениетіне бейімделуіне, академиялық жауапкершілік пен кәсіби пікірталас дағдыларын меңгеруіне жағдай жасайтын маңызды білім беру алаңы.