Нұры пейіште шалқығай

Тынтаева Шира Байбекқызының  әулетіне асыл аналарыңыз қайтыс болуына байланысты қайғыларыңызға ортақтасып, Республикалық физика-математика мектебінің ұжымы көңіл білдіреді. Шира Байбекқызы өзінің 45 жыл педагогикалық өтілінің 29 жылын туған Республикалық физика-математика мектебінде өткізді.

Тынтаева Шира Байбекқызы 1941 жылы 10 қыркүйекте Қарағанды облысы Дарье станциясында дүниеге келген, сол жерде орта мектепті бітірген. 1965 жылы С. М. Киров атындағы Қазақ мемлекеттік университетінің физика факультетін бітірді, мамандығы “Физик. Физика мұғалімі”.

Шира Байбекқызы РФММ аға мұғалімі қызметін атқарды, ғылыми-әдістемелік басылымдары бар, “ИФМ” журналының редколлегиясының мүшесі, “Физиканы оқыту әдістемесі” оқу құралының бірлескен авторы (2002 ж.), 10, 11 сыныптарға арналған физика есептер жинағының авторы (2003 ж.). Физика олимпиадаға үнемі дайындаған шәкірттері республикалық олимпиадаларда жүлделі орындарға ие болып, бүкілодақтық және халықаралық олимпиадалардың қатысушылары болған. Мектептің қоғамдық өміріне белсене қатысып, мектеп кәсіподақ комитетінің төрағасы болды. 29 жыл бойы РФММ-де сынып жетекшінің қызметін атқарып, оқу және тәрбие жұмысында үлкен жетістіктерге жетті. 2003-2004 оқу жылында 11 “Б” сынып “үздік бітіруші сынып”деп танылды.

Білім беру саласындағы Шира Байбекқызының жетістіктері танылып еңбегі елеусіз қалған жоқ: ол “Қазақстанның білім беру ісінің үздігі” төс белгісімен, “Білім беру ісінің үздігі” төс белгісімен марапатталды. ҚР Білім және ғылым министрлігінің Құрмет грамоталарымен марапатталған.

Марқұмның жатқан жері жайлы, топырағы торқа, иманы серік болсын.