АЛМАТЫ РФММ ТҮЛЕКТЕРІНЕ СОҢҒЫ ҚОҢЫРАУ СОҒЫЛДЫ

Міне, 2021-2022 оқу жылының да мәрелі сызығына жеттік. 25 мамырда Алматы РФММ-нің 180 түлегі Соңғы қоңырау салтанатты жиынында балалықпен, алтын ұя мектебімен қоштасты. Бұл күн – мектеп тарихында, мектеп бітіруші түлектер есінде мәңгі қалатыны анық.

Оқу жылының аяқталуына арналған салтанатты шара биыл дәстүрлі форматта өтті. Мерекелік жиынға барлық сыныптар, ұстаздар мен ата-аналар қатысты. Шараның басты кейіпкерлерін мектеп қауымдастығы жұлдызды шеруде қарсы алып, әрқайсысының жетістіктерін еске түсірді. Түлектерге РФММ Қамқоршылық кеңесінің мүшелері Наурузбаев Максат Сабырұлы және Оспанов Бахыт Насрадинұлы, мектеп директорының міндетін атқарушы Ордабаев Алмас Еркінұлы жылы лебіздерін білдіріп, сәт сапар тіледі.

Балаларымен бірге ата-аналар да қобалжу мен қуаныш сезімдеріне бөленді. Бітіруші түлектердің ата-аналары атынан құттықтау сөздері айтылды.

Жыл қорытындысы бойынша мектебіміздің үздік ұстаздары, жаттықтырушы және тәрбиешілері Директорлар кеңесінің төрағасы Каниев Берік Сералыұлының атынан алғыс хаттар мен ақшалай сертификаттарға ие болды.

Дәстүр бойынша соңғы қоңырау соғылып, түлектер өз ізбасарларына білім кілтін табыстады. Шара соңында бүгінгі күннің басты кейіпкерлері бір-біріне деген қимастық сезімдерін жеткізді.

«Республикалық физика-математика мектебі» табалдырығынан үлкен өмірге бүгін 180 түлек жолдама алды: 180 арман, 180 үміт, осынша сенім мен осынша тағдыр! Еліміздегі мыңдаған мектептерден мыңдаған түлектердің ұшып шыққанын ескерсек, ересектер қатары осынша адамға, осынша күшке толықты! Қанаттарың талмасын, жас түлектер!

Соңғы қоңырау салтанатынан суреттерді сілтеме бойынша көре аласыздар https://drive.google.com/drive/folders/1fQJmVRlhFjZCAQZiCbxQe6m4y-1f4mJ2