«Елім деп соққан жүрегім»

15 желтоқсан күні Қазақстан Республикасының Тәуелсіздігінің 30 жылдығына арналған «Елім деп соққан жүрегім» атты мерекелік кеш өтті.

9В, 9D сыныптары ұйымдастырған мерекелік шараны мектеп әкімшілігі, ұстаздары, қызметкерлері және оқушылары тамашалады. Мектеп басшысы еліміздің Егемендік алған күнімен құттықтап, азат еліміздің ертеңіне үлкен үмітпен қарайтынын жеткізді. Сонымен қатар, салтанатты шарада мектеп қызметкерлері, ұстаздары елеулі еңбектері үшін алғыс хаттарымен, мақтау қағаздарымен марапатталды.

«Біздің мақсатымыз ­– оқушыларды патриоттық рухқа тәрбиелеу, еліне деген, жеріне деген сүйіспеншілік сезімін ояту, Отанын қастерлеуге тәрбиелеу. Бұл мәдени шарада тек мерекелік ән-күй емес, патриоттық сезімді оятатын әндер орындалды. Жас ұрпақ соны біліп, санасына тоқып өсуі керек», – деді ұйымдастырушылар.

Кеш барысында мемлекетіміздің Әнұраны орындалып, оқушылар сахнаға мемлекеттік рәміз – Көк байрақты алып шықты. Өнерпаздар ұлттық рухты көтеретін, патриоттық сарындағы әндер шырқап, мың бұрала би билеп, күмбірлеткен күйлерінен сусындатты. Осылайша сахна төрінде өнер көрсеткен мектеп оқушылары бейбіт өмір сыйлаған батырларға алғысын жеткізгендей.

Көк байрағы желбіреген, бүгінгідей абыройлы да айбынды, беделді де берекелі, ынтымағы мен бірлігі жарасқан еліміздің тәуелсіздігі баянды болғай!