FAIO 2026 халықаралық жасанды интеллект олимпиадасының жеңімпаздары марапатталды

Республикалық физика-математика мектебі» КеАҚ ұйымдастыруымен SDU University базасында өткен FAIO 2026 (Firmat AI Olympiad) халықаралық жасанды интеллект және машиналық оқыту олимпиадасы өз мәресіне жетті.
Биыл олимпиаданың финалдық кезеңіне әлемнің 15 елінен 118 оқушы қатысты. Ал іріктеу кезеңінде 28 елдің 125-тен астам қаласынан шамамен 1 500 мектеп оқушысы бақ сынады. Іріктеу нәтижесінде 49 команда финалға жолдама алған болатын. Финалда барлығы 47 команда бақ сынады.

Халықаралық жарысқа Армения, Беларусь, Испания, Италия, Қазақстан, Кипр, Қырғызстан, Марокко, Моңғолия, Ресей, Румыния, Тәжікстан, Таиланд, Түрікменстан және Филиппин елдерінің оқушылары қатысты.

FAIO биыл үшінші рет ұйымдастырылды. 2024 жылы тек Қазақстан оқушылары қатысқан олимпиада бүгінде халықаралық деңгейге шықты. Оның басты ерекшелігі – мектеп оқушылары арасында жасанды интеллект және машиналық оқыту бағыттарын қамтитын командалық форматта өткізілуі. Бірден үш адамға дейінгі командалар программалау, деректерді талдау және математика бойынша тапсырмалар орындады. Олимпиадаға қатысу үшін машиналық оқыту саласында алдын ала тәжірибенің болуы міндетті емес. Қажетті теориялық материалдар қатысушыларға тапсырмалармен бірге ұсынылады.

Финалдық кезең бес сағатқа созылған екі турдан тұрды.

FAIO 2026 жеңімпаздары мен жүлдегерлері:

Гран-при – Ресей командасы;

I орын – 3 команда (Ресей);

II орын – 8 команда (Қазақстан, Ресей, Таиланд, Кипр);

III орын – 12 команда (Қазақстан, Румыния, Ресей, Испания, Моңғолия).

Жүлделі орындарға барлығы 23 команда ие болды. Олимпиаданың жалпы жүлде қоры 11 миллион теңгені құрады.

Олимпиаданың ұйымдастырушылары мен серіктестері

Жобаны өткізуге ірі технологиялық, қаржылық және білім беру ұйымдары қолдау көрсетті. activ 5G – телекоммуникациялық серіктес, Freedom Holding Corp. – технологиялық серіктес, ANSA Qory – инновациялар жөніндегі серіктес, Halyk – импакт-серіктес ретінде қатысты.

Сондай-ақ олимпиада серіктестері қатарында Mastercard, investbanq, MA7 Ventures, Silkroad Innovation Hub және Marine Health бар.
Әсіресе, Halyk-тің жобаны қолдауының маңызын атап өткен жөн. Қаржы ұйымының білім беру мен жас ұрпақтың дамуына бағытталған бастамаларға қолдау көрсетуі дарынды оқушылардың ғылыми-техникалық әлеуетін танытуға және халықаралық білім беру жобаларын дамытуға ықпал етеді.

Жобаның ақпараттық қолдауын Grants.kz, AICA, NARIKBI LIVE, stanbase, THE TECH, iCreator studio, ORA, Jibek Joly және berneiz медиа-серіктестері қамтамасыз етті.

Олимпиаданың халықаралық деңгейде өтуіне қолдау көрсеткен барлық серіктестерге алғыс білдіреміз. Олардың атсалысуы жобаның ауқымын кеңейтіп, дарынды оқушылардың әлеуетін ашуға және жасанды интеллект саласындағы білім беру бастамаларын дамытуға мүмкіндік берді.

Олимпиаданың халықаралық деңгейде өткізілуі Қазақстан оқушыларына шетелдік құрдастарымен білім сайысына түсіп, өз мүмкіндіктерін көрсетуге жағдай жасайды. FAIO жасанды интеллект саласындағы мектеп оқушыларына арналған халықаралық зияткерлік жарыс ретінде дамып келеді.

Олимпиаданы өткізуге қолдау білдірген барлық серіктестерге алғыс білдіреміз!