«Жігіт Сұлтаны-2022»

25 ақпанда Алматы РФММ 50 жылдығына орай «Жігіт сұлтаны-2022» байқауы өтті. Серілер сынына білекті де жүректі 11 жігіт қатысып, мықтылықтарын танытты.

Таныстыру кезеңінде жігіттердің білім, біліктілігі, сөз саптау, сөйлеу мәнері сыналды. Қатысушылар өзін, ата-тегін, өскен жерін дүйім жұртқа таныстырды. Бұл кезеңде шаршы топтың алдына шығып  тосылғандар да болды, арыны қатты ақындар да болды.

Байқаудың екінші кезеңінде жігіттер өз өнерлерін паш етті. Бірі мәнерлеп оқыса, бірі ұлттық аспаптың құлағында ойнады, бірі көрініс көрсетті. Келесі «Сұрақ-жауап» кезеңінде үміткерлеріміз «Жеті қазына», «Бес асыл іс» және салт-дәстүрлер туралы сұрақтарға сүрінбей жауап берді.

Сайдың тасындай сап түзеген сайыпқырандар сайыстың төртінші кезеңінде ләңгі тебу ұлттық ойынына қатысты. Үміткерлердің бұл сынағы да тартысты болды. Бұл кезеңде 8 «М» сыныбының намысын қорғап келген Ерік Бейбарыс жолда қалдыратын жігіт табылмады. Жастайынан спортпен айналысатын ол ләңгіні 29 мәрте теуіп, қарсыластарынан оқ бойы озық шықты.

Ауыз толтырып айта кететін жайт – бұл таланды тартысқа өзге ұлт өкілдерінің қатысқаны. Тишкин Яромир және Быстрицкий Матвей атты қатысушыларымыз барлық кзееңдерде тек қазақша сөйлеп, көпшілік көзайымына айналды. Жігіттердің бұндай батыл қадамға баруы бізді қуантты. Быстрицкий Матвей өнер сайысында атақты «Дос-Мұқасан» ансамблінің «Той жыры» әнін гитараның сүйемелдеуімен орындап, көрермендердің көңілін көтерді.

Төрт кезең бойынша өткен сайыста 8 «А» сыныбының серісі Амангелдин Заңғар «Жігіт сұлтаны-2022» атанды. Оған арнайы дайындалған «Жігіт сұлтаны – 2022» алтын белдігі табыс етілді.

Тәуелсіз елдің ұландары осылайша мықтылықтарын танытып, «Жігіт сұлтаны» деген атқа лайық екендіктерін дәлелдеді.

1. Амангелдин Заңғар 8 «А» – «Жігіт сұлтаны-2022»
2. Қдырбаев Әбілмансұр 8 «В» – «Сері жігіт»
3. Атамкул Жалгас 8 «С» – «Талантты жігіт»
4. Боранбаев Ерасыл 8 «G» – «Жалынды жігіт»
5. Қамытбек Дулат 8 «Н» – «Алғыр жігіт»
6. Ерік Бейбарыс 8 «М» – «Сегіз қырлы, бір сырлы»
7. Тишкин Яромир 8 «D» – «Шебер жігіт»
8. Кайназаров Райыс 8 «Е» – «Сымбатты жігіт»
9. Жәнібек Дінмұхамед 8 «F» – «Көрермендер көзайымы»
10. Адамбеков Мате 8 «К» – «Дарынды жігіт»
11. Быстрицкий Матвей 8 «L» – «Өнерлі жігіт»