Жәмішева Сәуле Әбірашқызының мерейтойы

Республикалық физика – математика мектебінде ұлағатты ұстаз, бар өмірін жас ұрпаққа білім мен тәрбие беруге арнаған Жәмішева Сәуле Әбірашқызының мерейлі 70 жасы салтанатты түрде аталып өтті. 

Елімізге танымал  азаматтар білім алған, Республикамызда білімнің қара шаңырағы аталған физмат мектебінде  Сәуле Әбірашқызы ұстаздық еңбек жолын  сызу пәнінен сабақ беруден бастап, директордың тәрбие ісі жөніндегі  орынбасары қызметіне дейін көтеріліп, өз қызметін абыройлы атқарып, аттай 47 жыл шәкірттерін өзінің тәлім-тәрбиесімен , білім нәрімен сусындатты. Осы жылдар аралығында Жәмішева Сәуле Әбірашқызының қолынан үлкен өмір жолына талай шәкірт түлеп ұшып, бүгінде Республикамыздың әр саласында қызмет атқаруда. 

Сәуле Әбірашқызы – мектеп ұжымның, ата-аналардың, оқушылардың құрметіне ие жанның бірі. Мерейлі тойдың салтанатты түрде аталып өтуін мектеп ұжымының бала тәрбиесіндегі  ұстаздың ұшан-теңіз еңбегін бағалау, шәкірттердің ұстазына деген шексіз махаббаты мен ұлан-ғайыр алғысы деп қабылдауға болады.

Ұлағатты ұстаздың мерейтойына мектеп ұжымы мен Сәуле Әбірашқызының ұстаздық жолын қуып, бүгінде осы мектепте мұғалім боп қызмет істеп жүрген түлектері, сондай-ақ бүкіл шәкірттері атсалысты. «Ұстазы жақсының – ұстамы жақсы» деген сөздің ақиқат екеніне  бүгінгі кештің өтуі дәлел.