Асқар Жұмаділдаевпен кездесу

15 Сәуір күні мектебімізде қонақта 1972 жылғы түлегі, белгілі қазақстандық ғалым және қоғам қайраткері, физика-математика ғылымдарының докторы, Қазақстан ҰҒА академигі, ҚБТУ МжК ҒБО профессоры Асқар Серқұлұлы Жұмаділдаев болды.

Кездесуге мектебіміздің оқушылары, мұғалімдері, ардагер ұстаздары қатысты. Бұл кездесуде оқушылар қазақстандық ғылымның аңызына айналған, әлемдік деңгейдегі тұлғамен тілдесудің, өздерін қызықтыратын сұрақтарын қоюдың, өз саласының тамаша маманынан математикадан кеңес алудың бірегей мүмкіндігіне ие болды.

Кездесу барысында Асқар Серқұлұлы оқушыларға өз өмірінің басты принциптері, бала кезіндегі армандары, математика жолын таңдау, оның қалыптасуына әсер еткен адамдар және өмірде қандай жетістіктерімен мақтанатыны туралы айтып берді.

А.С. Жұмаділдаевтің шетелдегі студенттік кезеңі мен қызықты жұмыс жылдары туралы әңгімесі кездесуге қатысушылардың ерекше қызығушылығын тудырды.

Мектебіміздің ардагер ұстазы сол кездегі интернат меңгерушісінің оқушы А.Жұмаділдаев туралы естелігімен бөлісті.