Астанада 21 Халықаралық Жәутіков Олимпиадасы басталды

Жиырма жыл қатарынан Республикалық-физика математика мектебінің ұйымдастыруымен Алматыда өткізіліп келген Халықаралық Жәутіков олимпиадасы биыл алғаш рет қатысушыларды Астана төрінде қабылдады.

Олимпиаданың салтанатты ашылу рәсімі «Бейбітшілік және келісім» сарайында өтті.

Математика, физика және информатика пәндері бойынша ең мықтыларды анықтайтын білім додасының ашылу салтанатына Қазақстан Республикасы Оқу-ағарту министрлігінің бірінші вице-министрі Наталья Жұмаділдаева, Астана қаласы әкімінің орынбасары Есет Бәйкен және Ұлттық ғылым академиясының академигі, Халықаралық олимпиададағы қазылар алқасының төрағасы Асқар Серқұлұлы қатысты.

Салтанатты ашылу рәсімінде 15 елден келген олимпиадашылар мен 150 жуық жетекшілер назарына қазақтың өнері бар нақышында паш етілді. Сонымен қатар, академик Орымбек Жәутіковтың өмірі мен еңбегі жайлы арнайы дайындалған бейнебаян көрсетілді.

Шет елдерден келген команда жетекшілері Халықаралық Жәутіков Олимпиадасының маңызын өте жоғары бағалаймыз деп атап өтті. Аталған олимпиаданың әлем елдері арасындағы достықты дамытуға да ықпалы зор. Қатысушылар да жоғары дайындықпен келгендіктерін атап өтті.