Алматы РФММ оқушылары математикадан жасөспірімдер арасындағы халықаралық Балқан олимпиадасында 1 күміс және 2 қола медальдарға ие болды

28 маусым мен 3 шілде аралығында Босния және Герцеговина елінің астанасы Сараево қаласында офлайн форматта математикадан жасөспірімдер арасындағы халықаралық Балқан олимпиадасы (JBMO) өтті.

Олимпиадаға Албания, Босния және Герцеговина, Болгария, Кипр, Македония, Греция, Молдова Республикасы, Черногория Республикасы, Румыния, Сербия сияқты Балқан түбегінің елдері қатысты. Биылғы жылы олимпиадаға 19 елден 81 қатысушы қатысып бақтарын сынады.

Жыл сайын Қазақстан олимпиадаға географиялық жағынан Оңтүстік-Шығыс Еуропада орналаспағандықтан, қонақ ел ретінде қатысады. Бұл жолы еліміздің құрама командасы 6 оқушыдан жасақталды. Оның ішінде Алматы РФММ үш оқушысы бар. Олар Егеубаев Динмухамед, Аманжолов Амирлан және Сахипов Әмір.

30 маусымда қазақстандық оқушылар теориялық турдың тапсырмаларын орындады, ал 3 шілдеде олимпиаданың салтанатты жабылу кезінде жеңімпаздар мен жүлдегерлерді марапаттау рәсімі өтті.

Олимпиадаға қатысудың қорытындысы бойынша Алматы РФММ оқушылары төмендегі жетістіктерге қол жеткізді:

• Егеубаев Динмухамед – күміс медаль;
• Аманжолов Амирлан – қола медаль;
• Сахипов Әмір – қола медаль;

Жалпы командалық есепте Қазақстан Румыния, Сербия, Түркия және Сауд Арабиясынан кейін 5-ші орынды иеленді.

Дарынды да білімпаз оқушыларымызды жеңістерімен шын жүректен құттықтаймыз!