АЗИЯ-ТЫНЫҚ МҰХИТЫ ХАЛЫҚАРАЛЫҚ ОЛИМПИАДАСЫНЫҢ ҚОРЫТЫНДЫЛАРЫ

2022 жылдың 15-16 наурызында XXXIV халықаралық Азия-Тынық мұхиты математикалық олимпиадасы өтті.

Олимпиада математикалық ғылымдар саласындағы дарынды оқушыларды анықтау және қолдау үшін жағдай жасау, қатысушы елдер арасындағы халықаралық білім беру және ғылыми байланыстарды дамыту мақсатында өткізіледі.

2022 жылы Азия-Тынық мұхиты математикалық олимпиадасына әлемнің 38 елінен үздік оқушылар қатысты, оның ішінде: Аргентина, Австралия, Бангладеш, Камбоджа, Канада, Чили, Колумбия, Коста-Рика, Эквадор, Сальвадор, Гонконг, Индонезия, Жапония, Қазақстан, Корея, Қырғызстан, Малайзия, Мексика, Жаңа Зеландия, Пәкістан, Панама, Перу, Филиппин, Пуэрто-Рика, Катар, Ресей, Сингапур, Шри-Ланка, Тайвань, Тәжікстан, Тайланд, Тринидад, Тобаго, Түрікменстан, АҚШ, Гондурас, ОАР, Түркия, Уругвай және басқалар.

Биыл Қазақстаннан АТМО-ға 131 оқушы қатысты. 40 қазақстандық оқушы Олимпиаданың жүлдегерлері атанды, олардың 5 – бірінші, 13 – екінші және 22 – үшінші орындарды иеленді.

Азия-Тынық мұхиты математикалық олимпиадасының жеңімпаздары қатарында Алматы РФММ 7 оқушысы да бар. І дәрежелі дипломға Байшуақ Райымбек  ие болды. ІІ дәрежелі дипломдармен Юркевич Мирон, Бектемір Қазыбек марапатталса, ІІІ дәрежелі дипломдармен Касенова Арай, Егеубаев Динмухамед, Аманжолов Амирлан, Топоров Ярослав марапатталды.

Алматы қ. РФММ математика пәнінің мұғалімі Медеубек Аманкелдіұлы Халықаралық математикалық олимпиада жоғары деңгейде өткенін атап өтті.

– Ғасырлар бойы қазақтар математика, логика сияқты ғылымдардағы білімдерімен танымал. Бұған Шығыстың көрнекті математигі және ойшылы Әл-Фараби айқын дәлел бола алады. Егер өткен жылы қазақстандық оқушылар 3 алтын медаль жеңіп алса, биыл олардың саны 5-ке жетті, – дейді Медеубек Аманкелдіұлы.

Біздің жас математиктерді жеңісімен құттықтаймыз және оларға сәттілік тілейміз!