ХІХ Халықаралық Жәутіков олимпиадасының салтанатты ашылуы

2023 жылдың 1 ақпанында Алматы РФММ-інде математика, физика және информатика бойынша ХІХ Халықаралық Жәутіков олимпиадасының салтанатты ашылуы өтті. Биылғы жылы дәстүрлі олимпиадаға әлемнің 25 елінен 1300-ге жуық қатысушы қатысып жатыр: Қазақстан, Аустрия, Армения, Әзірбайжан, Беларусь, Болгария, Вьетнам, Грузия, Индонезия, Қырғызстан, Моңғолия, Мысыр, Непал, Перу, Польша, Ресей, Румыния, Сербия, Тәжікстан, Түрікменстан, Түркия, Украина, Ұлы Британия, Үндістан, Өзбекстан. Еліміздің атынан Астана, Алматы, Шымкент және 17 облыстың командалары, сонымен қатар НЗМ және РФММ құрамалары қатысады.

Ашылу салтанатында ҚР Оқу-ағарту министрлігінің бірінші вице-министрі Каринова Шолпан Танатовна және Алматы РФММ директоры, математикадан PhD Кунгожин Алмаз Мухамбетович құттықтау сөз сөйледі. Қазылар алқасы атынан ҚР ҰҒА академігі, физика-математика ғылымдарының докторы, профессор Жұмаділдәев Асқар Серқұлұлы, ҚазҰУ-інің физика-техникалық факультетінің деканы, қауымдастырылған профессор Бейсен Нұрзада Абдибекқызы және МФТИ доценті, Халықаралық қазылар алақасының мүшесі Гуденко Алексей Викторович сөз сөйледі.

Олимпиаданың мақсаты оқушылар арасында физика-математика ғылымдарын насихаттау, халықаралық ынтымақтастықты дамыту, түрлі елдердің мамандандырылған мектептері арасында достық қарым-қатынас орнату, олимпиадаларды ұйымдастыру және өткізу тәжірибесімен алмасу, сондай-ақ Қазақстанның білім және мәдениет деңгейін көрсету.

ХЖО ҚР Оқу-ағарту Министрлігінің қолдауымен “Дарын” РҒПО және Алматы қаласы әкімдігінің қолдауымен өткізіледі. Олимпиадаға демеушілік көмек көрсетті: Lancaster group, Fizmat Endowment Fund, Nurlan Kapparov Foundation, “Қазпошта” АҚ, “Zapis KZ” ЖШС, Samal Lux, “АстанаБланкИздат” баспа-полиграфиялық кешені, “UMAG” ЖШС.

ХІХ Халықаралық Жәутіков олимпиадасының қатысушыларына сәттілік!