Fizmat оқушысы әлемдік чарттарды бағындыруда

Fizmat оқушысы дүниежүзілік музыка аренасында сенсация жасады. Бар-жоғы 11-сыныпта оқып жүрген ол өзінің «SLAVA FUNK» атты трегі арқылы әлемдік хиттің авторы атанды. Бүгінде бұл шығарма 200 миллионнан астам тыңдалым жинап, әлеуметтік желілерде 3 миллионнан аса бейнероликке саундтрек болып жазылды және жалпы қаралымы 3 миллиардтан асып отыр.

Музыка мектебінде «классикалық гитара» бойынша білім алған жас дарын танымал битмейкерлердің еңбектеріне қызығып алдымен түрлі бағдарламада тәжірибе жасап көреді. Кейін фонк жанры, әсіресе оның бразилиялық бағыты оған жаңа серпін сыйлайды. Дәл осы стильде ол өзін еркін сезініп, шынайы жарқын әуендер жазуға ден қояды.

«Музыкаға деген қызығушылығым дәл осы Республикалық физика-математика мектебіне келген кезден басталды. Бұл — еліміздегі бірегей білім ордасы. Мұнда тек физика-математикаға бейім оқушылар ғана емес, өнер мен шығармашылыққа құштар, ерекше дарынды жастар жиналған және олардың талантын ашуға мектепте көп көңіл бөлінеді. Физмат ортасы маған ерекше әсер етті, жаңа дүниелерге шабыт сыйлады», — дейді ол.

Қазіргі таңда «SLAVA FUNK» трегі 260-тан астам әлемдік чартта бой көрсетіп, Spotify-дың ресми Phonk плейлистінде 53-орыннан көрінді. Ал Shazam-ның жаһандық топ-200 тізімінде «Электронды музыка» санатында үздік үштікке дейін көтерілді.

Жас музыкант қазірдің өзінде платиналық продюсер мәртебесіне ие болып үлгерген. Алдағы уақытқа деген жоспары да ауқымды.

Алматы қаласындағы физмат мектебі оқушысының бұл жетістігі — дарын мен табандылықтың қай елдің болмасын жастарына әлемдік сахнаның есігін айқара ашатынын дәлелдейтін жарқын мысал.