Алматы қаласындағы Республикалық физика-математика мектебі – еліміздегі ең үздік олимпиадалық мектеп атанды.

2024–2025 оқу жылындағы жалпы білім беретін пәндер бойынша оқушылардың республикалық олимпиадасының қорытынды кезеңінде Алматы Республикалық физика-математика мектебі (Алматы РФММ) 76 ұпаймен республикалық рейтингте 1-орын иеленді.
Олимпиада нәтижесі бойынша мектебіміздің оқушылары:
– 9 алтын,
– 16 күміс,
– 17 қола медаль жеңіп алып, барлығы 42 жүлде еншіледі.
Бұл жетістік – оқушылардың табандылығы мен ізденісі, ұстаздардың кәсіби шеберлігі мен бағыт-бағдарының айқын жемісі.
Аталған рейтинг еліміздің олимпиадалық әлеуетін арттыру, дарынды оқушыларды және оларды дайындаған педагогтерді ынталандыру мақсатында әзірленді.
Республикалық кезең еліміздің 7 өңірінде өтті. Жалпы саны 600-ге жуық мектептен 1670 оқушы қатысқан бұл білім додасында мектебіміз биік белесті бағындырып, абырой биігінен көрінді.
Бұл көрсеткіш – ғылымға құштар жас ұрпақтың, еліміздің интеллектуалдық әлеуетін дамытуға сүбелі үлес қосып жүрген білім ордасының жемісті еңбегі.