7-сыныптарға арналған білім беру гранты бойынша «РФММ» КеАҚ филиалдарына конкурстық іріктеу туралы ақпарат

2026 жылғы 25 сәуірде «РФММ» КеАҚ-тың Астана және Алматы қалаларындағы филиалдарының 7-сыныптарына білім беру гранты негізінде оқушыларды қабылдау бойынша конкурстық іріктеу өткізілді.

Конкурстық іріктеу Қазақстанның жеті қаласында ұйымдастырылды: Астана, Алматы, Шымкент, Түркістан, Атырау, Ақтау және Орал.

Іріктеуге барлығы 8050 оқушы қатысты.

• Астана қаласындағы филиал бойынша – 3651 үміткер;
•  Алматы қаласындағы филиал бойынша – 4399 үміткер.

Үміткерлерге 30 тапсырма ұсынылып, ең жоғары нәтиже 150 балды құрады.

Конкурстық іріктеу оқыту тілдері бойынша — қазақ және орыс бөлімдері үшін жеке өткізілді. Бұл үміткерлердің нәтижелерін топтар аясында әділ салыстыруды қамтамасыз ету мақсатында ұйымдастырылды.

Бағалаудың объективтілігін қамтамасыз ету мақсатында қазақ және орыс тілдерінде білім алатын қатысушылар емтиханды бөлек топтарда тапсырды. Әр топ үшін арнайы жеке тапсырма нұсқалары дайындалды. Мұндай тәсіл ақпараттың алдын ала таралу қаупін төмендетіп, конкурстық іріктеуді ашық әрі әділ ұйымдастыруға мүмкіндік берді.

Сонымен қатар, үміткерлердің нәтижелері оқыту тіліне сәйкес жеке қарастырылды.

Конкурсты өткізу тәртібі, бағалау критерийлері және қатысушыларға қойылатын талаптар барлық үміткерлер үшін бірдей болды. Бұл тең мүмкіндік қағидатын сақтауға және конкурстық іріктеудің ашықтығы мен әділдігін қамтамасыз етуге бағытталды.

Білім беру гранттарының саны жыл сайын 11-сынып түлектерінің санына, филиалдардың оқушы қабылдау мүмкіндігіне және сыныптарды жасақтау қажеттілігіне сәйкес айқындалады.

Конкурстық іріктеу қорытындысы бойынша:

 Астана қаласындағы филиал бойынша:

• қатысушылар саны: 2076 / 1575;
  • шекті балл: 114 / 97;
  • грант саны: 49 / 47.

Алматы қаласындағы филиал бойынша:

• қатысушылар саны: 2890 / 1509;
•  шекті балл: 100 / 83;
• грант саны: 120 / 78.

«РФММ» КеАҚ конкурстық іріктеуге қатысқан барлық оқушылар мен олардың ата-аналарына мектепке деген қызығушылығы мен сенімі үшін алғыс білдіреді.

Біз әр отбасы үшін бұл кезеңнің маңызды екендігін түсінеміз және оқушыларды іріктеудің барынша ашық, әділ әрі объективті жүйесін қамтамасыз етуге басымдық береміз.