Алматы қаласында математика, физика және информатика пәндері бойынша XXII Халықаралық Жәутіков олимпиадасы өтті. Халықаралық зияткерлік додаға әлемнің 16 елінен 612 оқушы мен 122 жетекші қатысты.

Олимпиада екі турдан тұрды. Қатысушылар теориялық және практикалық тапсырмаларды орындап, пәндік білімдерімен қатар логикалық ойлау және стандарттан тыс шешім қабылдау қабілеттерін көрсетті. Тапсырмалар халықаралық қазылар алқасымен әзірленді.

Олимпиаданың салтанатты жабылу рәсімі 15 қаңтар күні Алматы қаласындағы Almaty Theatre ғимаратында өтті. Салтанатты іс-шараға Қазақстан Республикасы Оқу-ағарту министрі Жұлдыз Досбергенқызы, мемлекеттік органдардың, қала әкімдігінің және қатысушы елдердің өкілдері қатысты.

Олимпиада қорытындысы бойынша 70 алтын, 96 күміс және 158 қола медаль табысталды. Жалпы саны 324 медаль жеңімпаздар мен жүлдегерлерге тапсырылды.

Оның ішінде Республикалық физика-математика мектебінің оқушылары 4 алтын, 7 күміс және 10 қола медаль иеленіп, барлығы 21 медальға қол жеткізді.

Халықаралық олимпиаданы Қазақстан Республикасының Оқу-ағарту министрлігінің қолдауымен “Дарын” республикалық ғылыми-практикалық орталығы, Республикалық физика-математика мектебі ұйымдастырды.