Әлемдік білімге бастар жол

Advanced Placement (AP) — әлемнің үздік университеттеріне жетелейтін жол

Advanced Placement (AP) бағдарламасы – 10–11-сынып оқушыларына пәндерді тереңдетіп оқуға және әлемнің жетекші жоғары оқу орындарына түсуге мүмкіндік беретін жоба.
AP – бұл АҚШ-тағы College Board ұйымы әзірлеген, Принстон, Гарвард, Йель сияқты әйгілі университеттер қолдайтын жоғары деңгейлі оқу бағдарламасы.

Неліктен AP бағдарламасын таңдау маңызды:
• мектепте жүріп университет деңгейінде білім алу мүмкіндігі;
• университеттегі оқу мерзімін қысқарту (AP пәндері кредит ретінде есептеледі);
• стипендия алу мүмкіндігінің артуы;
• қаржы үнемі: мысалы, AP Calculus BC курсы университеттің 8 кредитіне дейін жаба алады, ал әр кредиттің құны шамамен 600–1200 доллар тұрады.

AP бағдарламасы РФММ-де

Алматы қаласындағы РФММ-де тереңдетілген оқытудың екі түрі бар – AP-сыныптар және AP-пәндер.

AP-сыныптар  – бұл арнайы сыныптар, онда оқушылар төрт негізгі AP-пәнді мектеп бағдарламасы аясында тереңдетіп оқиды. Оқыту кеңейтілген мазмұнда жүргізіліп, жоғары академиялық талаптар қойылады.

AP-пәндер – өз сыныбында оқи жүріп, таңдаған пәнін терең меңгергісі келетін оқушыларға арналған қосымша сабақтар. Олар негізгі сабақтардан кейін өткізіледі. Оқушылар өз қызығушылығына қарай пәндерді таңдап, жеке білім траекториясын қалыптастырады.

Яғни, AP-сыныптар – толыққанды тереңдетілген оқу форматы, ал AP-пәндер – икемді және жеке таңдау жасауға мүмкіндік беретін жүйе. Бұл модель дарынды оқушылардың өз әлеуетін барынша ашуына жол ашады.

AP-сыныптары туралы жалпы мәлімет

Алғашқы AP-сыныптары 2018 жылы Астана қаласындағы РФММ филиалында ашылды. Сол уақыттан бері 200-ден астам оқушы бағдарламаны сәтті аяқтап, әлемнің жетекші университеттеріне оқуға түсті.
2025 жылдан бастап Алматы қаласындағы РФММ-де де AP бағдарламасы енгізіліп, алдымен жеке AP-пәндер оқытыла бастады.

2025–2026 оқу жылында:
• Астана қаласындағы РФММ филиалында — 91 оқушы AP бағдарламасы бойынша білім алуда;
• Алматы қаласындағы филиалда — 70 оқушы AP-сыныптарын, ал 20 оқушы жеке AP-пәндерін таңдаған.

Қазіргі таңда екі филиалда да 10–11-сыныптың белсенді әрі мақсатшыл оқушылары AP бағдарламасы арқылы АҚШ, Еуропа және Азияның жетекші университеттеріне түсуге дайындалып жүр.

⚙️ 2025–2026 оқу жылындағы негізгі AP пәндері:
міндетті төрт пән:
• AP Calculus BC
• AP Physics
• AP Computer Science
• AP English

қосымша (топ жинақталған жағдайда):
• AP Chemistry
• AP Statistics
• AP Economics және басқа пәндер.

AP емтихандары жыл сайын мамыр айында өткізіледі.

Advanced Placement — бұл 10–11-сынып оқушыларына өз қабілетін ашуға, әлемнің үздік университеттеріне түсуге және академиялық болашағын бүгіннен бастауға мүмкіндік беретін бағдарлама!