Математика, физика және информатика пәндері бойынша XIV Халықаралық Жәутіков олимпиадасы аяқталды

2018 жылдың 15 қаңтарында әл-Фараби атындағы ҚазҰУ-де Ө.Жолдасбеков атындағы Студенттер сарайында Математика, физика және информатика пәндері бойынша оқушылардың XIV Халықаралық Жәутіков олимпиадасының жеңімпаздарын марапаттау және аталған олимпиаданың жабылу салтанаты өтті. Осы жылы олимпиадаға әлемнің келесі 15 елінен 72 команда қатысты: Қазақстан, Ресей, Беларусь, Грузия, Армения, Қырғызстан, Өзбекстан, Тәжікстан, Түркменстан, Болгария, Румыния, Сербия, Түркия, Иран және Индонезия. Сонымен қатар, Ираннан келген команда Халықаралық Жәутіков олимпиадасына алғаш рет қатысты. Осы жылы олимпиадаға қатысушылардың рекордтық саны келді – 482.

Халықаралық Жәутіков олимпиадасының ерекшелігі олимпиаданың қорытындылары бойынша тек жеке рейтинг ғана емес, сондай-ақ ең күшті мамандандырылған мектептердің рейтингі шығарылады. Олимпиаданың қорытындылары бойынша жақын және алыс шетелдің үздік мамандандырылған мектептерінің 7 командасы анықталды.

Командалық есепте Гран-приді №31 физика-математикалық лицейдің командасы,Челябинск қ. (Ресей Федерациясы) жеңіп алды. 1 орынды екінші жыл қатарынан Белград математикалық гимназиясының командасы, Белград қ. (Сербия) алды. 2 орынды №239 физика-математика мектебінің, Санкт-Петербург қ. және №1329 мектебінің, Мәскеу қ. (Ресей Федерациясы) командалары бөліп алды. 3 орынды «Физика-техникалық жоғары мектеп» лицейінің командасы, Санкт-Петербург қ. (Ресей Федерациясы), София Математикалық гимназиясының командасы, София қ. (Болгария) және Мәскеу Мемлекеттік Университетінің Мамандандырылған ғылыми-практикалық орталығының командасы, Мәскеу қ. (Ресей Федерациясы) алды. Тағы 7 команда құрмет грамоталарын алды.

Марапатталған команданың әрбір қатысушысына бағалы естелік сыйлықтар берілді.

Барлығы жеке біріншіліктің қорытындылары бойынша олимпиада қатысушыларына 42 алтын медаль, 63 күміс медаль, 105 қола медаль берілді.

Жалпы саны 210 медаль, солардың 60 медалін Қазақстанның оқушылары жеңіп алды: 7 алтын, 16 күміс, 37 қола.

Қазақстанның атынан ұсынылған 22 команданың ішінде Алматы қ. РФММ бірінші командасы ең жоғарғы нәтиже көрсетіп, мектеп командаларының рейтингісінде құрмет грамотасын алды. Барлығы «РФММ» КеАҚ оқушылары Қазақстанның пайдасына 13 медаль әкелді: 2 алтын, 5 күміс, 6 қола.

«Нұрлан Каппаров» қоғамдық қорының атынан «РФММ» КеАҚ Директорлар кеңесінің Төрағасы Берік Қаниев және Басқарма Төрағасы Ғабит Бекахметов тиісті математика, информатика және физика пәндері бойынша барынша көп балл жинаған қатысушыларға Нұрлан Каппаров, Илья Сегалович және Әділет Имамбеков атындағы арнайы жүлделерді табыстады.

Олимпиаданың жеңімпаздарына және жүлдегерлеріне Қазақстан-Британ техникалық университетінің, Халықаралық ақпараттық технологиялар университетінің (ХАТУ), сондай-ақ Сүлеймен Демирель атындағы университеттің  білім беру гранттары берілді. Халықаралық Жәутіков олимпиадасы Қазақстан Республикасы Білім және ғылым министрлігінің және «Республикалық физика-математика мектебі» КеАҚ бастамасымен, сондай-ақ ХАТУ және Алматы қаласы әкімдігінің қолдауымен өтті. Lancaster Group Kazakhstan, Fizmat Endowment Fund және «ABDI» компаниясы демеушілік көмек көрсетті.