«Аудиокітапты тыңдай білудің өзі – миға керемет жаттығу…»

19.02.20 жылы Алматы РФММ интернатының кітапханасында F2F Guests жобасының кезекті қонағы – жас та болса ерекше қалыптасып үлгерген тұлға, сәулетші, ақын, зергер Даурен Баймурзинмен кездесу болды.

Алматыдағы бірнеше танымал және сәулетті ғимараттар жобасының авторы, Анкара қаласындағы Таяу Шығыс техникалық университетінде сәулетші мамандығы бойынша білім алған аз ғана санаулы қазақстандық түлектердің бірі Даурен ағалары жасөспірімдермен өз өмірі мен қазіргі атқаратын қызметі және өнері туралы шынайы әңгіме өрбітті. “Мен Ақтөбе қаласының тумасымын, мектепті 2008 жылы «Алтын белгімен» бітірдім, – деп бастады өмірдерегін ол – “Мектептің соңғы жылы қандай мамандыққа барамын деп ойландым, сол кезде мені гуманитарлық ғылым және техникалық бағыттағы салалар қызықтырды, сөйтіп, мен екеуін үйлестіретін мамандық іздедім, сәулетші болуға ұстазым кеңес берді. Университетке ҰБТ нәтижесімен қабылдандым. Шетелде оқу – өзіңе өзің жасаған алғашқы қатал сынақ. Себебі онда жаныңда моральдық және қаржылық жағынан дер кезінде қолдай қоятын ата-анаң болмайды. Алғаш мен онда бірден қомақты ақшамен бардым да, оны орынсыз жұмсап, тез тауысып алдым. Ол ата-анамның да білместігі еді. Ондай кезде бірге жүрген достарың ғана демеу болады. Ақшаны үнемдеуді қалтаң қағылғанда үйрене бастайсың. Бірінші семестрден кейін-ақ бәрін қалпына келтірдім.

Мықты сәулетші нормалар мен ережелерді сақтап, адамға өте ыңғайлы үй салады. Біздің елдегі сәулетшілердің екіге бөлініп жұмыс істейтіні мені таңғалдырды. Бірі – жоба жасайтын, олар үйдің бұрыштарын қалай бекітуді жақсы біледі, екіншісі – интерьер-дизайнерлер. Жоба жасайтын сәулетшілер эстетика мен әсемдіктің не екеніне мән бермейді, ал мен оқыған университетте ондай бөлу болған жоқ. Бізді әдемі әрі дұрыс жоба жасауға үйретті. Оқу күрделі болды. Барлық сабақ ағылшын тілінде өтті. Үш жыл Стамбулда жұмыс істедім. Қазіргі уақытта Қызылорда облысындағы Шалқия поселкесінен табылған мырыш кен орнының шахталық-құрылыс жобасының жетекші менеджерімін. Он бес күндік ауысыммен жұмыс істеймін. Үйге келген соң бір күн ұйықтаймын, содан соң әр күнімді, уақытымды тиімді пайдалануға жұмсаймын. Пәтерлер мен кеңселердің дизайнер-интерьерін жасаумен айналысамын. Менде де кейде барлық ісімді кейінге қалдыра беру әдеті болады. Ондай кезде ештеңеге үлгермеймін…Өкінішке орай, бізде тайм менеджментті үйретпейді. Уақытыңды тиімді пайдалансаң – сенде бәрі болады.

Менің дәнекерлеу жұмысына деген ынтам зергерлікке алып келді. Мен өз қолыммен өнер туындыларын жасауға қызығамын, зергерлікпен айналысқаныма екі жылдан асты. Өзімді аздап мақтап қойсам болады, мен жасаған әшекей бұйымдардан үшеуі қазір шетелге: Австрия, Америка, Түркияға сатылды. Зергерлік – ұқыптылық пен шыдамдылықты және ерік күшін қажет ететін қолөнер. Ал ақындыққа келетін болсам, сатиралық жанрда өлеңдер жазамын. Ол өте сирек және күлкілі жанр. Өлеңдерім мерзімді баспасөзде жарияланады және өзім де көпшілік алдында оқимын.

Біздің музыкалық аспаптарда ойнайтын азаматтардан құралған өз тобымыз бар. Олардың бәрі өмірде үлкен жетістіктерге жеткен адамдар. Мен ең жасымын. Гитарада ойнаймын. Онда домбыра, шаңқобыз, т.б. ұлттық аспаптар да бар. Бірақ негізі гитарада көп ойнаймыз. Аптасына, кейде айына бір рет демалыс күндері кездесіп тұрамыз. Өз әндеріміз бар.

Болашақта өзім қалаған белгілі бір маршруттармен әлемге саяхаттауды жоспарлап жүрмін. Мен сіздердің жастарыңызда өте көп оқыдым. Кітап оқу –жан дүниеңді рухани қуатқа, білімге толтырады. Аудиокітап оқу өте пайдалы. Оны тыңдай білудің өзі – миға керемет жаттығу. Ішкі жан-дүиең әдемі қалыптасқанда, сыртқы әлемнен өзіңе не керегін білесің. Мақсатың нақты айқындалады. Мақсатың айқын болғанда не жасау керек және неге қол жеткізетініңді де анық білесің».

Әрине, жас әрі өз ісінің білікті маманының оқушыларға айтқан танымдық білім аясындағы теориялық та, практикалық та кеңесі көп болды. Бұл кездесу өзінің зейінді тыңдаушыларына, сөз жоқ, өмірлік ғибратты сабақ сыйлады.