Taste of profession – өндіріске бірінші шығу

Физмат «Environmental Project» саяхат сериясынан бірінші саяхатты бастады. 23 қыркүйекте РФММ және Haileybury оқушылары бірлесіп Алматы ЖЭО-2 станциясына іс-сапар жасады. Жылуэлектрорталығы (ЖЭО) бұл жылу электр станциясының бір түрі, ол тек электр қуатын ғана емес, сондай-ақ орталықтандырылған жылумен жабдықтау жүйелерінде жылу энергиясының көзі болып табылады.

Сіздің назарыңызға 11 «А» сыныбының оқушысы Жұлдызай Тлеубергеннің пікірін ұсынамыз: «ЖЭО-2 қаланың шетінде Алғабас кентінде орналасқан. Біз болған станция Алматыдағы ең үлкен станция болып саналады және біздің Алматы аймағының тұтынушыларын шамамен 70% электр және жылу энергиясымен қамтамасыз етеді.

Саяхат барысында бізге ЖЭО жұмысында табиғи отынның қуаты қалай пайдаланылатыны көрсетілді. Ол көмірді, табиғи газды, мазутты және т.б. жағу кезінде бөлінеді. Күн сайын станцияға шамамен он үш вагон көмір әкеледі (1 вагон = ~5 тонна көмір), содан кейін әр вагонды 175 ̊ бұрады да, барлық көмірді өңдеуге жібереді. Машина залында су құйылған сегіз қазан орнатылған (олардың алтауы КСРО кезеңінен қолданыста, қалған екеуі 2013 және 2016 жылдары орнатылды). Бұл қазандарда отын жанған кезде су 550 ̊С дейін көтеріледі және буға айналады. Бу қысым астында айналатын бу турбинасының қалақшаларын айналдырады. Турбина өз кезегінде электр тоғын өндіріп шығаратын генераторды айналдырады.

Сонымен қатар, станция қаланы тек электр қуатымен ғана емес сондай-ақ жылумен, тазартылған ыстық сумен қамтамасыз етеді.

ЖЭО-2 станциясында 650 астам қызметкер жұмыс жасайды. Жылу энергия станциясы сияқты кәсіпорындардың түрлерінде жұмыс жасау үшін бізге «Электр энергетикасы», «Жылу энергетикасы», «Құрылғы жасау» мамандықтарына оқуға түсуді ұсынды. Қазақстанда осындай мамандықтар бойынша ҚазҰТУ, АЭжБУ, ҚазҰУ университеттерінде білім алу ұсынылады.