РФММ төріндегі Наурыз Мерекесі

2022 жылғы Сәуір айының бірінші жұлдызында Алматы қаласындағы РФММ-де Наурыз мерекесі ерекше аталып өтті. 2022 жылғы Наурыз мерекесінің тақырыбы “Наурыз-2072” болып таңдалды. Бұл тақырыптың таңдалуының мақсаты: қасиетті қара шаңырақ болып саналатын РФММ-нің оқушылары ата-бабаларымыздан ұрпақтан ұрпаққа мұра болып қалған салт-дәстүрлерімізді, тілімізді, мәдениетімізді сақтап және берік ұстанып, өзінен кейінгі ұрпаққа сол қалпында жеткізу.

Заман қанша өзгеріп, әлем қарқынды дамығанымен, Біз – текті елдің ұрпақтары Ұлтымыздың тарихын, салт-дәстүрі мен әдет-ғұрыптарын, мәдени мұрамызды сақтауымыз қажет. Бұл біздің қасиетті парызымыз.

Оқушылар, сынып жетекшілері, ата-аналар, мектеп қызметкерлері жаңару күніне мерекелік іс-шара ұйымдастырды. Мектебіміздің өнерлі өрендері ән мен жырдан шашу шашты. Әр сынып мерекелік көңіл-күй сыйлап, ауылдың алты ауызынан түрлі сый тарту етті.

Әр сынып 7 түрлі ауылдарға бөлініп, халқымыздың дәстүрлі рәсімдерінен көріністер көрсетті, тақырыптарға сай ұлттық тағамдардан керемет дастархан жайылды.
Сері жігіттер мен сұлу бойжеткендер ұлттық нақыштағы киімдер киіп, мектеп алаңын ажарландырып жібергендей.

Ұлттық әдет-ғұрып пен салт-дәстүрден сыр шертетін әңгіме де айтылды, көрініс те қойылды, қазақы ойындарымыз да назардан тыс қалмады. Оқушылар мен мектептің ата-аналары мерекелік кешке аса ыждаһаттылықпен дайындалғаны көрініп-ақ тұрды.

Қыстан аман-есен шығып, мал тұяғы көкке, аузымыз аққа ілініп, ұлтымыздың Жаңа жылы мектебімізде осылай тойланды. Ауа-райы да бізбен бірге Наурыз мерекесін тойлағандай болды. Барлығының көңіл-күйі керемет! Әсіресе, оқушылар қуанып жүр.

Ұлыстың ұлы күнімен құттықтаймыз!
Жаңа жылымыз жаңа табыстарға жетелесін!

Суреттерді осы сілтемеден көре аласыздар: https://drive.google.com/drive/folders/1deO-h0pl7B_D_fpVX5Eeb3bojtPCRKP0?usp=sharing