«Айкөне» жаттығулары

Осы тақырыппен  РФММ интернатының кітапханасында «Рухани жаңғыру» үйірмесі мүшелерімен денсаулық сағаты өтті.

«Айкөне» – өзіндік ерекшелігі бар йога, цигун сияқты жаттығу десе де болады. Омыртқаның сау болуы – денсаулықтың кепілі. Бұл жаттығуда адам омыртқаны керу арқылы сыртқы ортаның әсерінсіз, терең бұлшық еттерге күш түсіріп қан айналымын кемеліне келтіре алады, небары 15 минуттың ішінде омыртқа қызып, ағзадан тер шығып, тәннің сауығуы күшейеді. Ежелгі қазақ даласында бұл әдіспен жауынгерлер, сынықшылар, емшілер айналысқан. Бүгінде оны қайта жаңғыртушы Абай Ақатұлы көп еңбегінің арқасында тек қазақ елінде ғана емес, шетелдерде де кең таныта бастады. Бұл туралы БАҚ құралдары мен интернеттегі әлеуметтік желілерде ақпараттар жетерлік, сондай–ақ National Geographic Қазақстан журналы да 2019 жылғы N8 санында жақсы мақала жариялады.

Үйірме жетекшісі Күнсая Ермекқызы: «Балалар, өздерің күнде көріп жүрген интернат дәлізінің қабырғасындағы бірнеше картиналарда бейнеленген қазақ руларының таңбалары – жай ғана сызық немесе сурет емес, өте ұзақ уақыттың ақпараттық жүгін арқалап тұрған, энергетикалық күші бар ғажайып құбылыс екен. Олай дейтініміз, Абай ағаларың өзі жаңғыртқан «Айкөне» жаттығуларының атауын Адай, Тама, Арғын, Жағалбайлы, Суан… деп атап, және осы атаулардың киесімен жаттығудың әсері жақсы жүретінін дәлелдеген. Ресейде бұл жаттығуды Денсаулық сақтау комитеті мақұлдаған. Бұл жаттығуларды жасау барысында адам атқа мінгендей, садақ тартып, немесе жайшылықта ер үстінде отырғандай күй кешеді. Бұдан жүйке жүйесі мықты болады екен.. Айкөне қазақ халқының игілігі, көне жәдігері. Сондықтан бұл жаттығу жүйесі туралы біліп жүргендерің еш артық емес, – деді.

Үйірме мүшелері денсаулық сағаты барысында «Айкөне» жаттығуларын жасап, көңіл күйлерін көтерді және бұл ешқандай мистика емес, әркімнің бойында өзіне ғана берілген қабілет-қасиеті барын, оны өмір қағидасын сақтаған жағдайда аша алатынына сенді.