«Тәжірибедегі рефлексия» мектепішілік курсы туралы

Қазақстан Республикасының Білім және ғылым министрлігі Мектепке дейінгі және орта білім департаментінің 24 тамыздағы №11-4/372 хатын басшылыққа ала отырып, мұғалімдердің кәсіби дамуын қалыптастыру және жаңа бағдарлама бойынша әдістемелік көмек көрсету мақсатында «Тәжірибедегі рефлексия» білім беру бағдарламасы бойынша Республикалық физика-математика мектебінде деңгейлік курс бағдарламасынан өтпеген мұғалімдер үшін 100 академиялық сағат көлемінде мектепішілік курс ұйымдастырылды.

Бағдарламаның негізгі мақсаты – мектеп мұғалімдерінің оқушылардың шығармашылық, зерттеушілік дағдыларын, логикалық және сын тұрғысынан ойлауын дамытатын технологиялар мен әдістемелерді  игеруі, оқыту үдерісін жоспарлау, оқушылардың оқу жетістіктерін жүйелі тиімді бағалау  дағдыларын жетілдіру.

«Тәжірибедегі рефлексия» білім беру бағдарламасы бойынша мектепішілік курсты НЗМ ДББҰ ПШО-да мектеп тренері бағдарламасы бойынша курстан өткен және сертификатталған қазақ тілі мен әдебиеті пәні мұғалімі Ахметбекова А.К. жүргізді.

Бұл бағдарлама бойынша оқыған мұғалімдер мектепішілік курс аясында жаңа форматтағы ашық сабақтар мен рефлексиялық есептер жазып,  орта білім беру мазмұнын жаңарту аясында мұғалімдердің оқыту тәжірибесін жетілдіру қажеттілігінің маңызын түсініп, оны өз есептерінде терең де мазмұнды баяндай білді.

Педагогикалық ұжым жиналысында РФММ коммерциялық емес акционерлік қоғамының басқарма төрағасы Баеков Е.С. курсты аяқтаған мұғалімдерге Білім және ғылым министрлігі бекіткен үлгідегі куәлікті салтанатты түрде табыс етіп, олардың ұстаздық еңбектеріне шығармашылық табыс тілей отырып, шәкірттерге өнегелі тәлім-тәрбие беріп, адамгершілік рухта бағыт-бағдар берудегі ұстаз еңбегінің ерекше екендігін айтып өтті.