Кітап сыйлайтын ғажайыптар

Қазір интернет және әртүрлі электронды құрылғылар шыққаннан кейін кітап оқу қызық болмай қалды. Бірақ ешқандай ақпарат көзі бізге кітап кейіпкерінің ойлары мен әр қадамына тиесілі күшті сезімді бере алмайды. Сондай-ақ кейіпкерді сезу мен оның жүрегінде не болып жатқанын білу – тек кітап арқылы ғана жүзеге асады. Рас, кейде біз кітапты сергу үшін, кейде бір нәрсені уайымдағанда босаңсып, әлемдегі бар нәрсені ұмыту үшін оқимыз. Бұл – кітаптың ғажайыбы.

Сонымен, 16 қазан күні РФММ интернатында жаңа кітапхананың тұсаукесері болды. Оған «100 кітап», «Сырғалым», «Рухани жаңғыру» үйірмелерінің мүшелері қатысты. Интернат меңгерушісі Александр Аркадиевич тұсаукесерде сөйлеген сөзінде: «Кітап біздің ақылымызға қорек және жанымызға жылу береді. Мың кітаптың ішінен бір кітап қана сенің өміріңді өзгертуге ықпал етуі мүмкін. Сондықтан сол кітапты табу үшін сіздерге көп кітап оқу керек. Ол – білім көзі. Тек білім ғана сіздерді мықты, зиялы және білімді етеді» – дей келіп, оқырмандарды бұл кітаптарға ұқыптылықпен қарауға шақырды.

Жаңа кітапхананың ашылуы балалардың көңіл күйіне жағымды әсер етті, олар «кітап – біздің рухани өсуімізге көмектеседі және біздің кім екенімізді түсінуге мәжбүр етеді» деп, қуаныштарын жасыра алмаған күйі кітаптарды өз қолдарымен кітап сөрелеріне орналастырды.